Saturday, July 17, 2010

အပျော်အပါးသက်သက်













ဒီတခါတော့ ပျော်ရာပျော်ကြောင်းလေးပဲ ရေးမယ်စိတ်ကူးတယ်။ ပြီးခဲ့တဲ့
စနေ၊ တနင်္ဂနွေက ကျွန်းကလေးတခုဆီ အလည်သွားတဲ့အကြောင်း။
ဘန်ကောက်ကနေ လေးနာရီလောက် ကားစီး။ ပြီးရင် နာရီဝက်လောက်
သင်္ဘောစီး။ အဲဒီကျွန်းကို ရောက်ကရော။

ကျွန်းနာမည်က Ko Samet လို့ခေါ်တယ်။ ထိုင်းပင်လယ်ကွေ့ မှာ ရှိတဲ့ကျွန်း။
ရေတွေက ကြည်စိမ်းနေတဲ့အပြင် ကမ်းခြေမှာ သဲဖြူတွေနဲ့ဆိုတော့ ကျွန်းက
သာယာတယ်။ သစ်ပင်တွေလည်း စိမ်းစိမ်းစိုစိုရှိတယ်။ ဘန်ကောက်ရောက်
ဧည့်သည်တွေအတွက် နှစ်ရက်စာ အပမ်းပြေခရီးထွက်လို့ကောင်းတဲ့ ကျွန်းပါ။

ကျွန်းပေါ်ရောက်တာနဲ့ ဆိုင်ကယ်ငှားတဲ့ဆိုင်တွေ တန်းစီလို့။ ဈေးလည်းပေါ
တယ်။ တရက်စာ ဆယ်ဒေါ်လာတောင် မကျဘူး။ ဓါတ်ဆီလည်း ဖြည့်ပေးတယ်။
ဆိုင်ကယ်တစီးနဲ့ငါ ကျွန်းကိုပါတ်ပါလေရော။ ဝေး ဟေး ဟေးပဲ။ ဘန်ကောက်
မှာဆို ဆိုင်ကယ်မစီးရဲဘူး။ ပလေးစတေရှင် ဆော့တာကမှ လွယ်ဦးမယ်။












တည်းခိုခန်းခလည်း ပေါသကွဲ့ ။ ကမ်းခြေနဲ့အနီးဆုံး ဘန်ဂလိုလေးကို ငှားလိုက်
တယ်။ စားသောက်ဆိုင်တွေ၊ လေဟာပြင်ဒစ္စကိုတွေကလည်း ကမ်းခြေနဲ့ကပ်လို့။
ဝေးဝေး ၀ါးဝါး လူတွေပျော်သံတွေကလည်း မပြတ်ဘူး။ အပျော်စီး မော်တော်တွေ၊
အမြန်ရေယဉ်လေးတွေ။ Speed Boat ကိုပြောတာ။ တ၀ူးဝူး တဝေါဝေါ။ လှိုင်း
ပုတ်သံကလည်း တသောသောနဲ့။ သာယာပေစွ Ko Samet.

နေ့လည်ခင်းကတည်းက ဆိုင်ကယ်တစီးနဲ့ပါတ်လိုက်တာ ညနေစောင်းမှ
အခန်းကို ပြန်ရောက်တယ်။ ရေကူးမယ်လေ။ ဒီတချက်တော့ သိပ်ပြီး
ခံတွင်းမတွေ့ ချင်ဘူးကွဲ့ ။ ရေက နွေးနွေးကြီး။ ကြာကြာကူးလို့ မကောင်းဘူး။
ခဏနေတော့ ကုန်းပေါ်ပြန်တက်။ ကင်မရာယူပြီး ကမ်းခြေတလျှောက်
စိတ်ကူးပေါက်ရာ လျှောက်ရိုက်ပါလေရော။












နေ၀င်ချိန်ဆိုတော့ ကမ်းခြေက တမျိုးကြည့်ကောင်းတယ်။ ညပိုင်းမှာရောင်းဖို့
ဆိုင်တွေကလည်း ပြင်ကြပြီ။ သဲပြင်ပေါ်မှာပဲ ဖျာတွေခင်းပြီး ရောင်းတာ။ မှီစရာ
ခေါင်းအုံးလေးတွေနဲ့။ ဇိမ်ပဲ။ ဧည့်သည်တွေက နိုင်ငံခြားသားထက် ထိုင်းလူမျိုး
တွေပိုများတယ်။ ထိုင်းတွေက ငွေကြေးချောင်လည်လာကြပြီလေ။ ခရီးထွက်တာ
ကို အပမ်းဖြေမှုအဖြစ် ဇိမ်ယူနိုင်တဲ့အဆင့် ရောက်လာကြပြီ။












ပြောရဦးမယ်။ ဒီကျွန်းမှာလည်း မြန်မာတွေရှိသဗျ။ ကိုဟူစိန်တဲ့။ ပလာတာ ရောင်း
ပါတယ်။ လှည်းကလေးနဲ့ ပလာတာသည်ပေါ့။ မော်လမြိုင်သားပါ ခင်ဗျား။ ပြုံးပြုံး
ပြုံးပြုံးနဲ့။ ခင်တတ်တယ်။ ပျော်တတ်တယ်။ အသက်သုံးဆယ်ကျော်။ ကွမ်းကလေး
တမြမြနဲ့။ ဘောလီးဝုဒ်မင်းသားနဲ့တောင် ခပ်ဆင်ဆင်။ ထွေရာလေးပါး ကိုဟူစိန်နဲ့
ပွါးကြတယ်။

ကိုဟူစိန် ထိုင်းမှာ ပျော်တယ်။ တရားဝင်အလုပ်သမားကဒ်လည်း လုပ်ထားတယ်။
နှစ်နှစ်တကြိမ်လောက် မော်လမြိုင်ကိုပြန်တယ်။ အမေကို သိပ်ချစ်တဲ့သား။ အမေက
လည်းသူ့ကို အချစ်ဆုံးတဲ့။ အမေက မိန်းမပေးစားချင်လှပြီ။ သူပေးစားတဲ့ မိန်းမကိုပဲ
ယူရမယ်လို့ အမိန့်ထုတ်ထားတယ်။ ချွေးမလောင်းကို အမေ့စိတ်ကြိုက် ရှာထားပြီးသား။
အမေ့ဆန္ဒကို မငြင်းချင်ဘူး။ ဒါပေမဲ့ ကိုဟူစိန်က မြန်မာပြည်ကထက် ထိုင်းမလေးတွေ၊
ထိုင်းကိုလာတဲ့ အရှေ့ အလယ်ပိုင်းသူလေးတွေကို သဘောကျနေတယ်။ သူတို့က
စဉ်းစားတွေးခေါ်တာ ခေတ်မှီလို့တဲ့။ လွတ်လပ်လို့တဲ့။

Ko Samet ကျွန်းမှာ ပလာတာလာရောင်းတဲ့ ကိုဟူစိန်။ အချဉ် မဟုတ်။ အိမ်ထောင်
ရေးကိစ္စဖြေရှင်းဖို့ သူ့မှာ နည်းလမ်းကောင်း ရှိပြီးသား။ အမေပေးစားတာကိုလည်း
ယူမယ်။ ထိုင်းမှာလည်း တယောက် ယူထားမယ်လေတဲ့။ ဟဲ...ဟဲ။ ကိုဟူစိန် ထိုင်းမှာ
ပျော်ပါတယ်။ ညနေလေးနာရီလောက်မှ အလုပ်စတယ်။ ကမ်းခြေမှာ တညလုံးရောင်း
တယ်။ မနက်ခင်း သုံးနာရီလောက်ဆို ဆိုင်သိမ်းပြီ။ ထိုင်းလိုလည်း လည်လည်ဝယ်ဝယ်
ပြောတတ်။ အရွှတ် အနောက်ကလေး ကလည်းရ။ ပလာတာကြိုက်တဲ့ ထိုင်းပျိုဖြူတွေ
ကိုဟူစိန်ကို ပြုံးစိပြုံးစိနဲ့။ သူ့ပလာတာကလည်း တကယ်ကောင်းပါတယ်။












ကိုဟူစိန်က ကမ်းခြေဒစ္စကိုရဲ့ ဒေါင့်မှာ သူ့လည်းကိုထိုးပြီး ပလာတာရောင်းတယ်။ ဒစ္စကို
ကလည်း သိကြတဲ့အတိုင်း တအုံးအုံးနဲ့။ ညနက်လေ ပိုဆူလေပဲ။ လူတွေကလည်း အော်
ဟစ် ကခုန်။ သောက်စား ပျော်ပါး။ ကိုဟူစိန်ကလည်း ဒစ္စကိုကထွက်လာတဲ့ ဒီဂျေတီးလုံး
ကို နောက်ခံထားပြီး ခြေလှုပ်ခေါင်းလှုပ်နဲ့ ပလာတာတွေကို တချပ်ပြီးတချပ် ပျော်ပျော်
ကြီးကြော်။ မကြာခဏ ထွက်လာတဲ့သီချင်းကလည်း လတ်တလောခေတ်စားနေတဲ့ ၀ါကာ
ဝါကာ အေး အေ။ ကိုဟူစိန်ကလည်း ဘောလုံးပွဲဆို အသေကြိုက်။ ၀ါကာ ၀ါကာကိုလည်း
ကြိုက်။

ကဲ ပျော်စရာမကောင်းဘူးလား။ မိတ်ဆွေတို့လည်း ထိုင်းကိုရောက်လို့ Ko Samet
ကျွန်းကို သွားလည်ရင် ကိုဟူစိန်ကို ရှာကြည့်ပါလား။ တွေ့ ရင် ဒို့က နှုတ်ဆက်တယ်
လို့ ပြောပေးပါ။ သူ့အိမ်ထောင်ရေးအခြေအနေကို စိတ်ဝင်စားရင်လည်း မေးကြည့်ပေါ့။
ကိုဟူစိန်က သဘောကောင်းတယ်။












(ဓါတ်ပုံတွေက ငါ့လက်ချက်ပေါ့)

3 comments:

ညီမလေး said...

ငါ့လက်ချက်နဲ့ပုံတွေကတော့ လှသလားမမေးနဲ့ ...
ကိုဟူစိန်ရဲ့ အိုက်ဒီယာကို ကျိတ်သဘောကျနေသလား ကိုဘီလူးစကိုင်းဖောရက်စ်းP

ကူးလွေ့ said...

အဟတ်ဟတ်...ပျော်စရာကြီးပါပဲ..။
ပေါ့ပေါ့ပါးပါးရှိလှတယ်။

Hmoo said...

ထိုင်း ပြောလို့သာ ထိုင်းမှတ်လိုက်ရတယ်၊
ကျောပေးရှောက်နေတဲ့ဓတ်ပုံက ထိုင်းမလေးတွေကိုကိုယ်စားမပြု၊
ဓတ်ပုံဆရာသည်အဖိုးကြိးဖြစ်လတန့်...
:)